اضحك مع .... نصائح طالب طب لزملائة لاجتياز امتحانات الشفوى بالكلية
كاتب الموضوع
رسالة
admin Admin
عدد المساهمات : 9696 تاريخ التسجيل : 06/08/2009
موضوع: اضحك مع .... نصائح طالب طب لزملائة لاجتياز امتحانات الشفوى بالكلية الجمعة نوفمبر 22, 2013 7:51 am
من الدروس اللي اتعلمتها خلال دراستي في كلية الطب هي فن مواجهة الإمتحان الشفوي ..
الإمتحان التحريري بتذاكره وبتروح تلاقي أسئلة بره المنهج تلبسها وتعك واللي يحصل يحصل لكن الإمتحان الشفوي مختلف ..
الإمتحان الشفوي هو مواجهة غير عادلة بين انسان طبيعي مذاكر وفاهم وعارف كل حاجة .. وانت ! ..
عشان كده اسمحولي أقدم لكم النهاردة شوية حيل دفاعية للتعامل مع الإمتحان الشفوي ..
١- رد على السؤال بسؤال : يعني نفرض مثلاً إن الدكتور سألك ( كلمني يا ابني عن انفصال الشبكية ) تقوم انت رادد عليه ( حضرتك عايزني أتكلم عن انفصال الشبكية ؟ ) .. هايقولك أيوه تقوم تسأله ( حضرتك عايز تعرف ايه بالضبط عن انفصال الشبكية؟ ) هايقولك مثلاً أسبابها وعلاجها .. تروح سيادتك تسأله ( حضرتك تحب أقول الأسباب الأول ولا طرق العلاج ؟ ) .. وهكذا لحد ما هو يزهق ويرد على سؤاله وانت تاخد الدرجة وتخلص !
٢- القصة الحزينة : ادخل على الدكتور لابس اسود في اسود وذقنك طويلة واقعد بص في السقف واعمل نفسك سرحان .. حتى لو سألك سؤال متردش وخليك باصص فوق .. طبعًا هو هايستغرب وهيسألك مالك ؟ وهنا حضرتك افتكر آخرة مرة خدت فيها مصروف عشان عنيك تدمع وابتدي احكيله مأساة صاحبك اللي مات قدام عنيك وهو بيحاول يصور كتاب المادة عشان انتوا فقرا ومش معاكوا تمن الكتاب .. احكيله ازاي انت وصاحبك ده اشتغلتوا على عربية كبده لسنين طويلة عشان تحوشوا تمن تصوير الكتاب وازاي كنتوا هتذاكروا انتوا الاتنين من نفس الورق وبالدور عشان مش معاكوا تمن نسختين وازاي لما صاحبك ذاكر الأول رمى نفسه من فوق السطوح بعد ما سابلك رسالة ( ذاكر انت يا صاحبي .. انا مش هاقدر أنجح ) .. قصة مؤثرة زي دي مش هاتخلي أي دكتور عنده دم يجرؤ يسألك على حاجة ولو سألك اقطع شرايينك قدامه واخلص !
٣- اتكلم بلكنة : ودي حيلة سريعة وعملية لكن المهم تكون لكنة عجيبة وليس لها أصل لغوي أو تاريخي .. يعني ادخل على الدكتور مثلاً وانت بتقوله ( صباحات مختاري ضاكتوري هاي ) وساعتها هو هايستغرب ويقولك انت منين ؟.. تقوم انت رادد عليه ( من قبيلة في افريكيا تعيش ملط وفيها ستات كتير حلوة ) وهنا ابقى قابلني لو الدكتور سألك عن حاجة إلا شروط الإنضمام للقبيلة دي !
٤- الزي المزدوج : ودي نصيحة مهمة للبنات وخصوصًا لو داخلة على دكتورة مش دكتور .. لو داخلة على دكتور خليكي شيك وفي قمة الجمال والأناقة وعيشي في دور الأميرة اللي جت تتفقد أحوال الرعية وقالت بالمرة أروح الإمتحان الشفوي .. لكن لو لقيتي دكتورة اللي هتسألك البسي مقطع ونعكشي شعرك لأن لو واحدة شافتك قمورة ساعة الإمتحان هتلاقي أسئلة من نوعية ( كلميني عن رسالة الدكتوراه اللي اتنشرت النهاردة الصبح من جامعة السوربون عن فلزات الكيما العضوية المتباعدة .. مقريتهاش ؟ .. لكن كان عندك وقت تحطي ميك أب ؟ ) !
٥ - نظرية الإحتضار : ودي محتاجة شوية مجهود عشان تتصدق .. اطلع قبل الإمتحان الصبح واتبرع بالدم ٣ مرات في كذا مستشفى مع إن المفروض يمر ٣ شهور ما بين كل مرة والتانية .. بعدها انزل ٥٠٠ ضغط ونط الحبل ٥٠٠ مرة .. كده هاتدخل الإمتحان وانت شاحب بتتطوح مش قادر تتكلم ولا ترد ولو الدكتور سألك مالك يا ابني ترد عليه ( آسف يا دكتور بس أصل طلع عندي سرطان كل حاجة لكن قلت آجي الإمتحان عشان نفسي أنجح قبل ما أموت الشهر الجاي ) !
٦- نزل سقف طموحاته : وده بتعمله بإنك تتأكد إن اللي داخل الإمتحان قبلك متخلف عقلي أو من كلية تانية .. مشكلتي أيام ما كنت في طب كانت إن اللي معايا في الراوند هو الأول على الدفعة وكنت بادخل بعديه ألاقي الدكتور بيسألني في غيبيات والعياذ بالله لكن بعد ما كنت باخلص كان اللي يدخل ورايا يتسأل في جدول الضرب والفرق بين الجملة الإسمية والجملة الفعلية !
٧ – ابحث عن فضيحة : لو بنت الموضوع سهل .. قولي الدكتور اتحرش بيكي ولو دكتورة قولي كانت عايزة تعرفني على جوزها .. لكن حضرتك لو دخلت على دكتور أو دكتورة اقف في وسط الإمتحان وزعق بأعلى صوت ( قلت لأ .. مش عايز أديك بوسة .. هو بالعافية ؟ ) !
٨ – خليك بطل : روح الإمتحان وانت لابس كلبشات ومعاك واحد صاحبك عامل ضابط .. ولو الدكتور سألك فيه ايه ؟ قوله اعتقولني عشان كنت باحلم بمصر حلوة وسمحولي آجي الإمتحان وبعدها هارجع يكهربوني تاني !
١٠ – ذاكر قبل الإمتحان : ودي أقل الطرق فاعلية وفرص نجاحها ضعيفة .. مهما ذاكرت وراجعت هايجيلك دكتور يسألك في الحاجة الوحيدة اللي نسيت تراجعها وكأنه حاطط كاميرات في بيتكم .. وفيه اللي ممكن يتحمس ويطلب منك تسمعله المنهج كامل وده حصل لواحد صاحبي الدكتور طلب منه يسمع منهج النسا كاملاً وأديني متخرج من عشر سنين وصاحبي لسه هناك في الإمتحان مخلصش !
اضحك مع .... نصائح طالب طب لزملائة لاجتياز امتحانات الشفوى بالكلية
الجمعة نوفمبر 22, 2013 7:51 am
