كيف نذاكر لإمتحان آخر العام؟؟ مقال للدكتور: عبد المتعال فوده
كاتب الموضوع
رسالة
admin Admin
عدد المساهمات : 9470 تاريخ التسجيل : 06/08/2009
موضوع: كيف نذاكر لإمتحان آخر العام؟؟ مقال للدكتور: عبد المتعال فوده الخميس يونيو 02, 2011 8:07 am
أولا: لم نفسك..
اجمع كل المذكرات ومصادر المعلومات الخاصة بالمادة وضعها أمامك
اجمع ورق الأسئلة لإمتحانات آخر 10 سنوات فى المادة
حدد لنفسك جدول زمنى لتخليص الورق (الفارما مثلا 12 يوم كفاية)
قسم الأيام على عدد صفحات المادة (الفارما مثلا 20-22 صفحة يوميا) .. اعمل جدول وضعه فى مكان ظاهر
ابدأ بتصفح أسئلة الإمتحانات السابقة وحدد النقاط الآتية: الشكل العام لورقة الإمتحان من حيث عدد وشكل وتوزيع الأسئلة اكتب بجانب كل سؤال باللون الأحمر الشابتر الذى ينتمى إليه حدد نقاط ضعفك والأجزاء الأكثر تعرضا للأسئلة والأسئلة التى تتكرر كثيرا
ابدأ بمذاكرة الأجزاء الأكثر ضعفا لديك وأثناء مذاكرة أى موضوع حاول أن تتذكر الأسئلة التى وردت فى هذا الموضوع
دائما استخدم أقلام ملونة لتظليل المعلومات المهمة ... اكتب أى ملاحظات بخط يدك فى الهوامش وبين السطور .. ارسم قلوب واكتب شعر... براحتك... كل الحاجات هتخلى عينك تحفظ شكل الصفحة وتفتكر المعلومات اللى فيها.
بعد أن تنتهى من مذاكرة موضوع معين روح إلعب شوية... مش كتير... ولما ترجع امسك ورقة وقلم وحاول تجاوب أى سؤال ييجى على بالك وجه فى الأمتحانات السابقة على هذا الموضوع... مش لازم تكتب بالتفصيل عشان متضيعش الوقت لكن على الأقل العناوين الرئيسية للموضوع والمعلومات المهمة. طبيعى أن تشعر بأنك لا تستطيع تذكر المعلومات كاملة رغم أنك لسه قارئ الموضوع من ساعتين... عادى... متتخضش
إرجع مر بعينك بسرعة على الموضوع وشوف النقط اللى انت نسيتها ونسيتها ليه واكتب جنبها بالعربى "متتنساش بعد كده يا برنس "أو يا هانم".... كده يبقى انت ذاكرت الموضوع 3 مرات: مرة فى الأول ومرة لما حاولت تمسك القلم وتجاوب ومرة لما رجعت بصيت على الموضوع تانى... انقل على الموضوع اللى بعده وبنفس الطريقة...
مطلوب تخلص يوميا 20-22 صفحة غسيل ومكوة... قصدى مذاكرة وحل أسئلة... المذاكرة عليها 50% من الدرجة وحل الأسئلة يجيبلك 50% الباقيين...
معظم أسئلة الإمتحان هتيجى من الأسئلة اللى انت حليتها بالنص لأن الدكاترة بيخافوا يألفوا أسئلة جديدة لتطلع غلط...
بعد أن تنتهى من مذاكرة 3 أو 4 شباتر للمادة حل عليهم أسئلة مرة واحدة ... كل مرة تلاقى نفسك ناسى ترجع تفتح المذكرة تانى وتبص على اللى انت نسيته .. ده طبيعى.. ولو لقيته من الحاجات اللى دايما تنساها اكتب جنبها بالعربى أى شتيمة تناسبك .. أنا راضى ذمتك
بعد أن تنتهى من مذاكرة المادة غسيل ومكوة إمسك ورقة امتحان كاملة وحلها بالورقة والقلم وبالوقت كأنك فى صالة الإمتحان... أكيد هتلاقى نفسك لو حاولت تكتب كل اللى تعرفه هتاخد وقت كتير.. مش عاوز الغلطة دى تحصل فى الصالة..
السؤال أبو 15 المفروض يتحل فى 20 دقيقة على الأكثر والسؤال أبو 5 ياخد 5 دقائق... ده فى غالبية الأحوال
لو لقيت السؤال طويل حاول تكتب فيه أهم النقاط بشكل عام .. لا تغرق فى التفاصيل حتى لا تضيع الوقت هدرا
ثانيا: مرحلة ما قبل الإمتحان بيومين تلاتة:
هتحس انك مش فاكر ولا كلمة وأول خاطر هيجيلك إنك تأجل المادة... غلطططط وأكبر غلط... إياك .. قول لنفسك هدخل ولو هشيل المادة ...
ثالثا: وأنت فى صالة الإمتحان:
ابدأ بحمد الله والثناء عليه لأنه أوصلك إلى هذا المكان...
أول ما تمسك ورقة الأسئلة متتخضش... مفيهاش عفريت... دى أسئلة من اللى انت بقالك 20 يوم بتحلها وطحنتها..
إقرأ كل الأسئلة يسرعة ولو لقيت فيه سؤال أو دوا متعرفوش اسأل عليه رئيس القسم قبل ميمشى لأنه بيفضل موجود بعد توزيع ورق الأسئلة فى الصالة لكى يجيب على أى استفسار... عادى متخافش..
إقرأ السؤال جيدا مرة واتنين قبل متبتدى فى الإجابة وحدد هو عاوز منك ايه بالضبط.. بص تانى للسؤال ابتدى بحل الأسئلة اللى انت مذاكرها كويس وسيب اللى انت مش عارفه للآخر... ربنا يسهلها من عنده.. دائما ركز فى الوقت .. لا تغرق فى التفاصيل ..
خللى خطك واضح والكلام مالى الصفحة ومرتب قدر الإمكان
أعدك بأنك سوف تجيب على كل الأسئلة حتى اللى انت مكنتش عارفها بشكل لم يكن ليخطر على بالك.. وهتقول الحمد لله انى مأجلتش
وقالوا الحمد لله الذى هدانا لهذا وما كنا لنهتدى لولا أن هدانا الله...
============== رابط الموضوع الأصلى ==============
Dr khaled
كيف نذاكر لإمتحان آخر العام؟؟ مقال للدكتور: عبد المتعال فوده
الخميس يونيو 02, 2011 8:07 am
