موضوع: نصائح لكي أيتها الزوجه السبت سبتمبر 21, 2019 9:42 am
نصائح لكي أيها الزوجه
اخطاء تقع فيها الزوجة ركزى معايا اوى لانها مهمة :
-اهمالها لبسها ..حبيبتى البسي ضيق فى بيتك جلاليب لااا وبعدين تقولى بيبص برا !! طب خليه يبص جوا ^_^ ونظافتها اليومية من ريحة ونعومة (حتى لو هو مش مهتم انتى اهتمى)
-الصوت العالى والعصبية وقبل كدة قلت كله بالتدريب ولما ابنك يغلط احرميه من حاجة بيحبها لحد ما يتعلم ويعتذر ولو حاسة انك محتاجة تصرخى ادخلى الغرفة اقفلى الباب عليكى وحطى الوسادة على شفايفك وصرخى ولا من شاف ولا من درى ^_^
-نقد الزوج يعنى لما يغلط متعمليش فيها ابلة الناظرة اقلبيها ضحك قوليله ايه يا عم اللى انت عملته ده ههه كدة لو الحاجات بسيطة متمسكلوش على الواحدة اما لو حاجة كبيرة فاعملى عصير ليمون كدة واتفضل يا حبيبى وبعدين ناقشيه بالراحة وفهميه انك فاهمة وجهة نظره بس المشكلة فى النقطة دى لان مفيش حد الا القليل بيعترف بخطأه لكن المناقشة بهدوء بتخليه يفهم الصح وبعدين حتى لو قال لا هو صح قوليله زى ما تحب بس انا عارفة انك فهمتنى وهتعيد تفكير واكيد مش هتخيب ظنى وامشي وسيبيه خليه ياخد ويدى مع نفسه مش تطبقى على نفسه -_- لغه الحوار هي الحل الأمثل لعلاقة سويه
-ستات كتيرادمنهنمع العلاقه الحميمة على اساس انها مخنوقة وبتعمله ارضاء لله وخلاص واللى تقول انت كبرت على الكلام ده واللى تقول مش فاضية دلوقتى واللى تقول ده كل اللى يهمك ..ايه فى ايه ؟؟ بتعملى كدة ليه ؟؟ المفروض ده متعة ليكى انتى كمان حسسيه انك مبسوطة انه بيعمل كدة معاكى وانك مبسوطة انه عايزك واستمتعى في الحلال جربى تحسي بيها فعلا
-كثرة التليفونات دى غلطة كبيرة لانك بتبقى محاصراه كأنك الشاويش عطية انت فين بتعمل ايه وحشتنى كله كوم واللى كل شوية تقول لجوزها قولى بحبك قولى انك بتحبنى قووول ! يا ستى اديله فرصة يشتاق علشان يقول لو هو من النوع اللى بيحبك تتصلى بيه وحنين بزيادة يبقى اتصلى يوم اه وثلاثة لا اما لو هو كأغلب الانواع -_- مش حنين اوى يبقى حضرتك متتصليش خالص هو لما يتصل ابقى ردى بدلع ومتشتكيش فى التليفون لا هزرى اضحكى خليه يحب يسمع صوتك
-قلة المدح ..الست من دول تقولك ايه؟ امدحه؟؟ وبعدين يتنفخ عليا !! سيبيه يتنفخ يا فوزية هههه لما يعمل حاجة حلوة انفخيه وادعيله ادمه دعوتين ولما ميساعدكيش متمدحيش طبعا انتى لازم تطلبى منه يساعدك ويشيل الحاجة التقيلة ويشيل معاكى الاطباق اطلبى بدلع وانتى لابسة الضيق حتى لو شال وهو مخنوق انتى لما تمدحيه ويتنفخ هيحب يساعدك علشان يبقى بالونة
-اهم غلطة اغلب الستات بتقع فيها ..لو علاقتك بربنا متوترة متستنيش علاقتك تبقى باقرب الناس ليكى كويسة ده اقل عقاب او ابتلاء علشان ترجعى ..راجعى نفسك كدة ..حجابك عامل ازاى بنطلونات وكدة ؟ طب صلاتك مواظبة عليها فى وقتها ؟ صيامك ؟ غض البصر ؟ لسانك بيكذب ؟طب بيشتم او بيلعن ؟ .هو ده البند الرئيسي لإصلاح حياتك راجعي نفسك علشان تكتبي دنيا وآخره
السبت سبتمبر 21, 2019 9:42 am
